Kan iemand Pretoria-spanne se oorheersing in Gauteng stuit?

Kan iemand Pretoria-spanne se oorheersing in Gauteng stuit?

posted in: Gauteng | 0

Die beste o.12 tot o.19 netbalspanne in Gauteng kom eerskomende naweek by Hoërskool Dr. EG Jansen vir die jaarlikse Gauteng Senior Sekondêre Netbal-kampioenskappe byeen.

Dit was ‘n bedrywige seisoen wat afgeskop het met die jaarlikse vriendskaplike toernooie gedurende die April skoolvakansie, waar sommige van die spanne reeds die geleentheid gehad het om mekaar op te weeg voor die amptelike liga-wedstryde vir die seisoen.

Affies Meisies se A-spanne het skoonskip gemaak in die o.14 tot o.19 ouderdomsgroepe in die Jubilee-liga, en dit is dus geen verrassing dat hul spanne in meeste afdelings die gunstelinge sal wees nie. As die top netbalskool in die land van 2016, het die 2017 seisoen weereens nie teleurgestel nie.

Die o.16A en o.19A spanne van Hoërskool Menlopark en Hoërskool Garsfontein, wat onderskeidelik die tweede en derde plekke in die Jubilee ranglyste beklee, sal hard moet werk om deur te dring na die uitspeelwedstryde.

Garsies se o.19 A’s sal eers met die top span in die Johannesburg streek, Helpmekaar moet afreken, terwyl Menlo Park in dieselfde poel as Hoërskool Kempton Park, wenners van die Ekurhuleni streek ingedeel is.

Menlopark, wat as kampioene van die Wildeklawer- en Tuksreeks gekroon is vroeër die jaar, sal beslis gretig wees om nog ‘n geleentheid te kry om teen Affies Meisies te speel, aangesien hul daardie liga-wedstryd met slegs ‘n enkele doel verloor het.

Ander skole in die o.19A kompetisie om dop te hou is die gasheer, EG Jansen wat tweede in die Ekurhuleni streek geëindig het en Vereeniging Gimnasium wat in Sedibeng geseëvier het.

Wedstryde skop om 8:00 Vrydagoggend af en die o.19 eindstryd word Saterdag om ongeveer 17:00 beslis.

Volg gerus ons Facebookblad vir gereelde uitslae en fotos.

Leave a Reply